Xəbərlər
Təhsildə Keyfiyyət Təminatı Agentliyinin İdarə Heyətinin sədri Ülkər Səttarova institusional akkreditasiya qiymətləndirməsindən uğurla keçmiş ali təhsil müəssisələrinə (Bakı Dövlət Universiteti, Azərbaycan Texniki Universiteti, Azərbaycan Dövlət Pedaqoji Universiteti) akkreditasiya şəhadətnamələrini təqdim edib.
Akkreditasiya şəhadətnamələrini qəbul edən ali təhsil müəssisələrinin rektorları institusional akkreditasiya qiymətləndirməsi nəticəsində Akkreditasiya Komissiyaları tərəfindən verilmiş tövsiyə və göstərişlərin növbəti illərdə görüləcək fəaliyyətlərə faydalı istiqamət verdiyini xüsusi qeyd edib.
Təhsildə Keyfiyyət Təminatı Agentliyinin İdarə Heyətinin sədri Ülkər Səttarova öz növbəsində ali təhsil müəssisələrinin rektor və əməkdaşlarını təbrik edib, onlara gələcək fəaliyyətlərində uğurlar arzulayıb.
Qeyd edək ki, Azərbaycan Respublikası Elm və Təhsil Nazirliyinin Akkreditasiya Şurasının 8 iyun 2023-cü il tarixində keçirilmiş iclasında Azərbaycan Texniki Universiteti, Bakı Dövlət Universiteti, Azərbaycan Dövlət İqtisad Universiteti və Azərbaycan Dövlət Pedaqoji Universitetinin institusional akkreditasiya nəticələri “əsasən uyğundur” hesab edilərək sözügedən ali təhsil müəssisələrinin növbəti 5 il müddətinə akkreditasiya edilməsi haqqında qərarı alınıb.
